حضرت جابر بن عبداللہ فرماتے ہیں کہ میں نے بارگاہ رسالت مآب ﷺ میں عرض کیا: میرے ماں باپ آپ ﷺ پر قربان ہوں، کچھ خبر دیجئے کہ سب سے پہلے اللہ تعالیٰ نے کون سی چیز پیدا کی؟ آپ ﷺ نے فرمایا
اے جابر! اللہ تعالیٰ نے تمام اشیاء سے پہلے تیرے نبی کا نور اپنے نور سے (نہ بایں معنی کہ نور الٰہی اس کا مادہ تھا، بلکہ اپنے نور کے فیض سے) بلکہ اپنے نور سے پیدا کیا، پھر وہ نور قدرت الٰہیہ سے جہاں اللہ تعالیٰ کو منظور ہوا سیر کرتا رہا، اور اس وقت نہ لوح تھی نہ قلم تھا، نہ بہشت تھی، نہ دوزخ تھی، اور نہ فرشتے تھے، نہ آسمان تھا، اور نہ زمین تھی، اور نہ سورج تھا، اور نہ چاند تھا، جب اللہ تعالیٰ نے مخلوقات کو پیدا کرنا چاہا، تو اس نور کے چار حصے کئے، اور ایک حصے سے قلم پیدا کیا، اور دوسرے سے لوح اور تیسرے سے عرش۔
دوسری روایت
حضرت عمر بن حارث بن ساریہ سے روایت ہے کہ نبی کریم ﷺ نے ارشاد فرمایا کہ بے شک میں حق تعالیٰ کے نزدیک خاتم النبنیین ہو چکا تھا اور حضرت آدمؑ ہنوز اپنے خمیر ھی میں پڑے تھے (یعنی ان کے جسد میں جان بھی نہ آئی تھی)۔
تیسری روایت
حضرت ابو ہریرہؓ سے روایت ہے کہ صحابہ کرام نے پوچھا یا رسول اللہ! آپ ﷺ کو نبوت کے لئے کس وقت ثابت ہو چکی تھی؟ آپ ﷺ نے فرمایا: جس وقت میں آدم ہنوز روح و جسم کے درمیان تھے (یعنی ان کے جسم میں جان بھی نہ آئی تھی)۔
چوتھی روایت
شعبیؒ سے روایت ہے کہ ایک شخص نے عرض کیا، یا رسول اللہ! آپ ﷺ کب نبی بنائے گئے؟ آپ ﷺ نے فرمایا کہ آدم اس وقت روح اور جسد کے درمیان میں تھے جب کہ مجھ سے میثاق (نبوت کا) لیا گیا کہ:
کَمَا قَالَ تَعَالٰی وَإِذْ أَخَذْنَا مِنَ النَّبِيِّينَ مِيثَاقَهُمْ وَمِنْكَ وَمِنْ نُوْحٍ۔
روایت کیا اس کو ابن سعدؒ نے جابرؓ جعفی کی روایت سے، ابن رجبؒ کے ذکر کے موافق۔
پانچویں روایت
احکام ابن القطان میں منجملہ ان روایات کے جو ابن مرزوقؒ نے ذکر کی ہیں حضرت علی بن الحسین (یعنی زین العابدینؒ) سے روایت ہے، وہ اپنے باپ حضرت امام حسینؓ اور وہ ان کے جد امجد یعنی حضرت علیؓ سے نقل کرتے ہیں کہ نبی کریم ﷺ نے فرمایا کہ میں آدم کے پیدا ہونے سے چودہ ہزار برس پہلے اپنے پروردگار کے حضور میں ایک نور تھا۔
No comments:
Post a Comment